ONGIETORRIA

Gipuzkoako Foru Aldundiaren ongi etorria

Mugikortasun jasangarriari eta energia biltegiratzeari lotutako industria-ehuna finkatu eta garatzea lehentasuna da Gipuzkoarako, Etorkizuna Eraikiz programaren esparruan egiten ari garen apustu estrategikoen barruan. Gipuzkoak munduan erreferente diren enpresa traktoreak eta alor horretan punta-puntakoak diren teknologia-zentroak eta ikertzaileak ditu, baita hainbat elkarte eta erakunde ere, sistema eta teknologien industria, ikerkuntza eta prestakuntza sustatzeko lan egiten dutenak.

Go Mobility azokari esker, aukera handiak ematen dituen eremu batean posizionatuko dira Gipuzkoa eta bertako industria, baina, batez ere, Europako enpresek mugikortasun jasangarriari eta energia biltegiratzeari dagokienez zer aurrerabide egin duten erakusteko balioko du. Laburbilduz, guztion artean aurrera egitea da helburua, etorkizuneko industriarantz, hurrengo urteotan auzo eta hirietan zehar azkarrago, seguruago eta modu jasangarriagoan mugitzea ahalbidetuko baitigu guztioi.

Markel Olano Arrese

Gipuzkoako Foru Aldundiaren
Diputatu Nagusia

Eusko Jaurlaritzaren ongi etorria

Eusko Jaurlaritzak Euskadin ibilgailu elektrikoa sar dadila sustatzen du, garraioaren eraginkortasun energetikoa hobetzeko bide gisa eta euskal industria-ehunean negozio aukera berriak bultzatzeko elementu gisa. Euskadi da Mugikortasunaren, Logistikaren eta Garraio Sistema Adimendunen sektoreko enpresa garrantzitsuenetako zenbaiten egoitza, eta, hain zuzen, BPGaren % 30 hartzen dute. Industria bereziki berritzailea da, eta posizionamendu lehiakorra du balio-katean, bai Europan bai mundu osoan. GO MOBILITY azoka erakustoki aparta izango da sektore gero eta zabalago honentzat, barne hartzen dituelarik ibilgailuen ekoizpena, energiaren banaketa, eta are birkargatzeko azpiegiturak, mantentzekoak eta hornitzaile-sare zabala.

Urrats irmoak egin ditugu mugikortasun elektrikoaren bidean, hala garraio publikoari nola ibilgailu pribatuari dagokienez, Gasteizen eta Donostian Autobus Elektriko Adimenduna zerbitzuan jartzeko esperientzia pilotuak eginez, birkargatzeko sarean gune berriak gehituz, eta energia biltegiratzean edo baterietan hobekuntzak aztertuz. Jarduketa horiek bat datoz Eusko Jaurlaritzak sustatzen dituen 3E2030 estrategia energetikoarekin eta Garraio Jasangarriaren Gidaplanarekin (PDTS2030), eta kontsumo energetikoa murriztearen eta eredu elektrifikatuagorantz iragatearen alde egiten dute, bai bidaiarien bai salgaien garraioari dagokienez: mugikortasun jasangarriko eredu bat, abangoardian kokatzen gaituen industria-ehun eskarmentudunarekin.

Arantxa Tapia

Ekonomiaren Garapen eta Azpiegiturako sailburua
Eusko Jaurlaritza