• Azoka egin eta hiru hilabetera, erakusketa-espazioaren % 70 merkaturatu da.
  • Abian da, halaber, bisitari profesionalak erakartzeko kanpaina
  • Etorkizuneko mugikortasunaren azoka Ficoban egingo da, Irunen, martxoaren 11n eta 12an
  • Industria-erakustaldi hori, Europako hegoaldean erreferente dena, Gipuzkoako Foru Aldundiaren Etorkizuna Eraikiz programaren barruan dago.


Go Mobility azokaren bigarren edizioaren komertzializazioa erritmo onean ari da garatzen. Aurten, etorkizuneko mugikortasun berriari helduko dio azokak, hau da, ingurumena errespetatzen duen mugikortasunari, mugikortasun segurua, eskuragarria eta konektatua, eta 50 enpresa baino gehiagok parte hartuko dutela baieztatu dute.

Martxoaren 11n eta 12an Ficoban egingo den Go Mobility azokaren bigarren edizio honek euskal enpresen ordezkaritza zabala izango du, baina baita Estatuko beste zonalde batzuetakoa ere, batez ere Madrilgoa eta Bartzelonakoa, %20 inguruko ordezkaritzarekin. Europako konpainia askoren interesa ere piztu du hitzorduak, eta, oraingoz, %20ko pisu globala du, non Frantziako enpresen presentzia nabarmentzen den. Datu horiek indartu egiten dute azokaren bigarren edizio honen nazioartekotzearen aldeko apustua.

Konpainia horiek ordezkatzen dituzten sektoreei dagokienez, ordezkaritza handiena karga-azpiegiturari dagokio, eta ondoren datoz mugikortasun jasangarriko irtenbide integralak, tranbien, autobusen, autoen, furgoneten eta kamioien fabrikatzaileak edo azpikontratatzaileak, energia-biltegiratzea, osagai-fabrikatzaileak, teknologia- eta ikerketa-zentroak, unibertsitateak eta lanbide-heziketa.

Erakusketari batzuek, beren produktuak eta zerbitzuak beren standetan erakusteaz gain, beren ibilgailuak probatu eta martxan ikusteko aukera eskainiko dute Test Drive gunean. Dagoeneko baieztatuta dago Irizar e-mobility, Basque mobility, Seat, Tecnalia, Man, Renault eta IK4 CEIT enpresen parte-hartzea.

Esperientziak ezagutzeko guneak

Era berean, hitzaldi-programa ere eratzen ari da, jardunbide egokiak, proposamenak, joerak eta arrakasta-kasuak erakusteko. Hizlarien artean Ignacio Barrios, Kido Dynamicseko zuzendari nagusiaren asistentzia baieztatu da. Konpainiak 6 herrialdetan dihardu lanean, fisika sozialean oinarritutako Big data aztertzeko irtenbide berritzaileak eskaintzen dizkie enpresei eta tokiko gobernuei. “Mugikortasunaren Big Dataren demokratizazioa datuetan oinarritutako ekonomia bultzatuz” gaiaz hitz egingo du Barriosek.

Go Mobilityn izango dela baieztatu duen beste hizlarietako bat Raluca Fiser da, Green Revolution ingurumen arloko GKEko presidenteordea, hiri berdea eraikitzeko neurriak ezartzen dituen Errumaniako lehen GKEa.  Go Mobility 2020n, Ralucak hiriko mugikortasunaren inguruko joerei buruz hitz egingo du.

Go Mobilityk Belgikako elektromugikortasunerako elkartearen (AVERE) esperientziak ezagutzeko aukera ere eskainiko du, Philippe Vangeel idazkari nagusiaren edo Som Mobilitat kooperatiba katalanaren eskutik, zeinak bere bazkideen joan-etorriak iraunkorragoak izan daitezen lagunduko duten ekintzak eta proiektuak bultzatzea baitu helburu.

Esperientziak ezagutzeko espazioen proposamena poster eremuarekin osatzen da. Go Mobility azokaren lehenengo edizioan bereziki harrera ona izan zuen espazio horrek, non Europako mugikortasun berriko hainbat proiektu ezagutzera ematen baitira poster formatuan.

Bisitariaren profila

Go Mobility-k mugikortasun berriaren balio-kateko sektoreetan interesa duten 4.000 bisitari erakartzea du helburu, hala nola komunitate eta udalerrietako ordezkari politiko eta teknikoak, azpiegitura publikoen eraikitzaileak, eraikuntza zibileko eta arkitekturako enpresak, azken erabiltzaileari zuzendutako azpiegituren enpresa kudeatzaileak, energia-hornitzaileak, industria osagarria, taxien enpresa operadoreak, ibilgailu partekatuko zerbitzuak, hurbileko garraioa eta banaketa, ingeniaritzak, IKT-ak eta inbertsio-sareak edo arrisku-kapitala, besteak beste.

Go Mobility-ri buruz

Go Mobilityk Europako hegoaldean erreferentziazko hitzordu gisa finkatzea du helburu mugikortasun jasangarri eta adimendunaren balio-kateko eragile guztientzat, eta topagune bihurtzea balio erantsi handiko trukeak sustatzeko, proiektu berritzaileak bultzatzeko eta lurraldearen eraldaketa industriala sustatzeko. Azokak merkaturatze prozesua hasi du dagoeneko, eta lehen erakustokiak izen-ematea formalizatzen hasi dira dagoeneko.

Industria-erakustaldi hori Gipuzkoako mugikortasun elektrikoaren industria-garapenerako estrategiaren barruan kokatzen da. Estrategia hori mugikortasunarekin eta energiarekin zerikusia duten 40 eragilek, enpresak, teknologia-zentrok eta erakundek baino gehiagok parte hartuta egin da, eta hiru ardatz estrategikotan egituratzen da: garapen industriala eta teknologikoa bultzatzea, behar berriei erantzuteko azpiegiturak eta gaitasunak garatzea, eta lurraldea mugikortasun elektrikoaren eta energiaren biltegiratzearen eremuan kokatzea.

Go Mobility Gipuzkoako Foru Aldundiak eta Eusko Jaurlaritzak sustatzen dute, eta bi erakundeak bultzatzen ari diren Mugikortasun Elektrikorako eta Energia Biltegiratzeko Estrategiaren barruan kokatzen da.